ТЕНДЕРТ ОРОЛЦОГЧДОД

Тодруулга хүргүүлэх тухай

Төрийн худалдан авах ажиллагааны газраас зарласан ТХААГ/202302003/01 дугаартай “Бод малын ээмэг ерөнхий гэрээгээр худалдан авах” төсөл арга хэмжээний тендерт оролцохыг сонирхогч этгээдээс ирүүлсэн тодруулгад захиалагч Хүнс, хөдөө аж ахуй хөнгөн үйлдвэрийн яамнаас ирүүлсэн тодруулгын хариуг хүргүүлж байна. Үүнд:

Сонирхогч этгээдээс ирүүлсэн тодруулга

Захиалагч яамнаас ирүүлсэн тодруулгын хариу

1. Монгол улсад малын бүртгэлийн хэрэгслүүд /энгийн ээмэг, цахим ээмэг, тусгай унших хэрэгслүүд, ээмэглэгч бахь, зүү/-ийг хэрэглэх үндэсний стандарт байхгүй байхад уг тендерийг зарласан нь хууль эрхзүйд нийцэхгүй  байгааг тодруулах,

Хүнс, хөдөө аж ахуй, хөнгөн үйлдвэрийн сайдын 2019 оны А/501 дүгээр тушаалаар Малын бүртгэлийн журмыг баталсан байдаг. Уг журмын 2.2.2-д бод малыг ялган тэмдэглэх хэрэгслийг хэмжээ, шаардлагыг тодорхой заасан. Энэхүү заалтыг үндэслэн бод малын ээмэг ерөнхий гэрээгээр худалдан авах төсөл арга хэмжээний нийлүүлэгчийг сонгох тендерийн техникийн тодорхойлолтыг бэлтгэн баталсан. Түүнчлэн Стандарт, хэмжил зүйн газрын даргын 2023 оны с/09 дүгээр тушаалаар “малын ээмэг ерөнхий шаардлага MNS6996:2023” үндэсний стандартыг батлуулан мөрдөн ажиллаж байна. Тиймээс уг тендер шалгаруулалтын техникийн тодорхойлолт нь холбогдох хууль, эрх зүйн баримт бичигтэй нийцэж байгаа болно. 

1. Энэ тендерийн бүрэлдэхүүнд тусгайлсан мэргэжлийн төрийн болон төрийн бус ямар бүрэлдэхүүнтэйгээр тендерийн бичиг баримт боловсруулж олон нийтээс үнийн санал авч байгаа нь тодорхой бус байгааг тодруулах,

Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуулийн 47 дугаар зүйлд заасан шаардлагыг хангаж тендерийн үнэлгээний хорооны бүрэлдэхүүнийг баталсан. Уг хуулийн 47.4-д заасны дагуу тендерийн үнэлгээний хорооны бүрэлдэхүүнд төрийн бус байгууллагын төлөөлөл хоёр гишүүн оруулсан. Мөн малын ээмэгний ерөнхий шаардлага хангуулах үүднээс Хүнс, хөдөө аж ахуй, хөнгөн үйлдвэрийн яамны Мал аж ахуйн бодлогын хэрэгжилтийг зохицуулах газрын малын генетик нөөцийн хэлтсээс нэг төлөөллийг үнэлгээний хорооны бүрэлдэхүүнд багтаасан.

1. Үхэр сүргийг ээмэглэх энгийн ээмэгний үнийг 2000 төгрөгөөр тогтоосон боловч хэдэн ширхэг ээмэг авах санхүүжилтийг тусгаагүй нь тендерийн хуулийг зөрчиж байгааг тодруулах,

Сангийн сайдын 2017 оны “Журам батлах тухай” 234 дүгээр тушаалаар баталсан ерөнхий гэрээ байгуулах журмын 3.4.1-д заасны дагуу нэгжийн үнийн дээд хязгаарт суурилан тендерийн баримт бичиг боловсруулсан.

1. Улсын төсвөөс аль эсвэл бусад санхүүжилтээс хэдий хэмжээний мөнгө гаргах шийдэл нь тодорхой бус байгаа нь захиалагч аливаа нэгэн этгээдтэй нийлж нийлүүлэх хэмжээгээр нь санхүүжүүлэх мөнгө угаалтын хардалт үүсч байгааг тайлбарлуулах,

Монгол Улсын Засгийн газрын 2023 оны 02 дугаар сарын 08-ны өдрийн 63 дугаар тогтоолын гуравдугаар заалтаар өгсөн үүргийн дагуу Хүнс, хөдөө аж ахуй, хөнгөн үйлдвэрийн сайдын 2023 оны А/54 дүгээр тушаалаар шийдвэрлэгдсэн эх үүсвэрээс энэхүү ерөнхий гэрээг санхүүжүүлэхээр тогтсон. Ерөнхий гэрээ хэрэгжүүлэхээр шалгарсан аж ахуй нэгжтэй гэрээ байгуулж, санхүүжүүлэх тушаалыг шилэн дансанд байршуулах тул ямар нэгэн нуусан, хэн нэгэн этгээдтэй нийлсэн асуудал байхгүй, цаашдаа ч гарахгүй гэдгийг илэрхийлье.

1. Техникийн бичиг баримтын үзүүлэлтэд тухайн бүтээгдэхүүнийг хийх материал, түүхий эдийн талаар тодорхой бус байгааг тодруулах,

Нийлүүлэх барааг үйлдвэрлэх үндсэн материалыг тендерийн баримт бичгийн техникийн тодорхойлолтын 1.6-д доорх байдлаар тодорхой дурдсан. Үүнд:

• Ээмэг нь өндөр чанарын полиуратени түүхий эдээр хийгдсэн, уян хатан гадны нөлөөнд тэсвэртэй, хугардаггүй, зөөлөн, өнгө нь хувирдаггүй, малын биед сөрөг нөлөөгүй байх

Мөн тендерийн баримт бичгийн техникийн тодорхойлолтын 1.12-д үйлдвэрлэгч нь ээмэгний материалыг холбогдох лабораториор шинжлүүлсэн дүгнэлт ирүүлнэ гэж заасан. Энэ нь тухайн нийлүүлэх ээмэгний материалын шаардлагыг хангаж байгаагаа лабораторийн дүгнэлтээр нотлох тухай тусгасан болно

1. Техникийн үзүүлэлтэд хэдэн мянган ширхэг баркод уншигч хэрэгсэл, ээмэглэх бахь, зүүг заавал тооцоолон тусгах ёстой. Үүнийг ээмэгний нэгдсэн үнэд тусгасан эсэх нь тодорхой бус байгааг тодруулах

Хүнс, хөдөө аж ахуй, хөнгөн үйлдвэрийн яамны хэрэгжүүлж буй цахим хөдөө аж ахуй бодлогын хүрээнд малын бүртгэл, мэдээллийн нэгдсэн санг хөгжүүлэн үйл ажиллагааг хэвийн явуулж байна. Уг нэгдсэн сангийн бүртгэл, хяналтын ажиллагааг “Мал аж ахуй” нэртэй гар утасны апплейкшн ашиглан гүйцэтгэхээр зохицуулагдсан. Уг гар утасны  апплейкшн нь малын чихэнд байгаа ээмэгний кодыг шууд уншин мэдээллийг харуулахаар програмчлагдсан тул заавал баркод уншигч дагалдуулан авах шаардлагагүй юм. Мөн ээмэглэгч бахины тухайд энэхүү тендерээр худалдан авах ээмгэнд зориулан тусдаа санхүүгийн эх үүсвэрээр авахаар төлөвлөсөн тул тендерийн баримт бичигт тусгаагүй болно.

1. Ерөнхий тендерт оролцогч нь ялсан тохиолдолд тухайн бүртгэлийн хэрэгслийг Захиалагчийн эцсийн хүлээн авах орон нутаг, аймаг, баг, сум тодорхой бус, үйлчилгээний хөлсийг тооцоолон тусгаагүй байна. Монгол улсын 21 аймаг, 331 сум, 805 баг бүр тусдаа малын бүртгэлийн кодлосон системтэй. Үүнд тулгуурлан аймгаас-сум-баг-ийн дэс дараалсан кодоор тусгайлан үйлдвэрт кодлож үйлдвэрлэх шаардлагатай. Эдгээр эрхзүйн болон техникийн онц шаардлагатай үзүүлэлтүүдийг тусгаагүй орхигдуулсаныг тайлбарлуулах,

Тендер шалгаруулалтын үр дүнгээр ерөнхий гэрээ байгуулсан аж ахуй нэгжээс худалдан авалт хийхдээ бараа хүргэгдэх газрыг тодорхой заах бөгөөд захиалагчийн шийдвэрийн дагуу аль аймагт хэдэн ээмэг хүргэхийг шийдвэрлэнэ. Тендерийн баримт бичигт бараа хүргэгдэх эцсийн цэгийг захиалгын маягтад заасан хаягт хүргэхээр заасан. Ерөнхий гэрээ байгуулсан аж ахуй нэгжээс зөвхөн нэг захиалагч худалдан авалт хийхгүй өөр бусад захиалагчид бүтээгдэхүүн авах учраас нэг тогтсон хаяг заах нь тохиромжгүй байдаг. Худалдан авалт тутамдаа захиалгын маягтад бүтээгдэхүүн хүргэгдэх хаягийг заана.

1. “Бод малын ээмэг ерөнхий гэрээгээр худалдан авах” тендерийн баримт бичгийг захиалагч баталгаажуулаагүй байхад яагаад зарласан бэ? Тайлбар өгнө үү?

Бод малын ээмэг ерөнхий гэрээгээр худалдан авах төсөл арга хэмжээний нийлүүлэгчийг сонгон шалгаруулах тендерийг Төрийн худалдан авах ажиллагааны газар зарласан бөгөөд тендерийн баримт бичгийг тус газрын дарга баталгаажуулсан. Хүнс, хөдөө аж ахуй, хөнгөн үйлдвэрийн яам нь малын бүртгэл, мэдээллийн асуудлыг хариуцаж байгаа төрийн мэргэжлийн байгууллагын хувьд бод малын ээмэгний техникийн тодорхойлолтыг бэлтгэн туслалцаа үзүүлэн ажиллаж байна.

            Дээрх тодруулгатай холбогдуулан тендерийн баримт бичгийн тендер шалгаруулалтын өгөгдлийн хүснэгтэд дараах өөрчлөлтийг оруулж байна.

Үүнд:

1. ТОӨЗ 23.1 Тендер хүлээн авах эцсийн хугацаа нь: Тендер 2023 оны 04 дүгээр сарын 26-ны өдөр. Цаг: 11:00 цаг.
2.  ТОӨЗ 26.1 Тендерийн нээлт хийх огноо, цаг нь: 2023 оны 04 дүгээр сарын 26-ны өдөр. Цаг нь: 11:10 цаг.