ЗӨВЛӨХ СОНГОН ШАЛГАРУУЛАХ ЗАРЛАЛ

Үндэсний Хөгжлийн Газар (ҮХГ) нь “Дэлхийн тогтвортой хөгжлийн зорилтууд”(ДТХЗ) болон “Монгол Улсын Тогтвортой хөгжлийн үзэл баримтлал-2030”(МУТХҮБ-2030)-г хэрэгжүүлэхтэй холбоотой Mонгол Улсын Гадаад худалдааны бодлого, зохицуулалтыг боловсронгуй болгох асуудлаар дүн шинжилгээ хийх, бодлогын санал зөвлөмж боловсруулах зөвлөх үйлчилгээний гэрээ байгуулах гэж байгаа тул зөвлөхийн үйлчилгээг үзүүлэх хүсэлтэй хуулийн этгээдийг мэдүүлгээ ирүүлэхийг урьж байна.

Зөвлөх үйлчилгээний зорилго нь Монгол Улсын гадаад худалдааны бодлого, зохицуулалтын одоогийн тулгамдсан бэрхшээлтэй асуудлуудыг судлах, дүн шинжилгээ хийж, “МУТХҮБ-2030”-н хэрэгжилтийг хангахад шаардлагатай гадаад худалдааны бодлого, зохицуулалтыг боловсронгуй болгох судалгааг хийх, бодлогын зөвлөмж, санал, дүгнэлт гаргах, одоо үйлчилж байгаа хууль эрх зүйн баримт бичгүүдэд нэмэлт, өөрчлөлт оруулах үндэслэл, шаардлагыг тодорхойлох, зөвлөмж боловсруулахад оршино.

Ажлын зорилго:

1. Монгол Улсын гадаад худалдааны бодлогын өнөөгийн нөхцөл байдал, тулгамдсан асуудал, хүндрэл бэрхшээлд, дүн шинжилгээ хийж, цаашид боловсронгуй болгох, арга замыг тодорхойлох, гадаад худалдааны олон улсын туршлагыг судлаж, Монгол Улсад нэвтрүүлэх боломжийн талаар санал зөвлөмж боловсруулах;
2. Дэлхийн худалдааны байгууллага, түүний гишүүн орнуудад тавьдаг нийтлэг шаардлагууд болон олон улсын худалдаанд ашиглаж байгаа гадаад худалдааны тарифын болон тарифын бус зохицуулалт, ялангуяа экспорт, импортын бараа, түүхий эдэд тавьдаг стандартуудыг судлаж, экспортын бараа бүтээгдэхүүнийг сертификатжуулах, гадны стандартыг нутагшуулах, үндэсний стандартыг бий болгох аргачлалыг судлах; 
3. Монгол Улс дотоодын үйлдвэрүүдээ урамшуулах, тэдгээрийн үйлдвэрлэлд шаардлагатай зарим түүхий эдийг боловсруулалтгүй гадаадад экспортлохыг хязгаарлахад гадаад худалдааны тарифын болон тарифын бус зохицуулалтыг (дотоодын зах зээлийн хамгаалалтын механизмууд, демпинг) ашиглах боломжийг тодорхойлох;
4. Гадаад худалдааны уян хатан бодлого зохицуулалтыг бий болгосноор  боловсруулах салбар болон эдийн засаг нийгэмд үзүүлэх үр нөлөөг судлах, санал дүгнэлт, зөвлөмж гаргах;
5. “Монгол Улсын тогтвортой хөгжлийн үзэл баримтлал 2030”-г хэрэгжүүлэхэд дэмжлэг болохуйц гадаад худалдааны хуулийн төслийг боловсруулах

Уг зөвлөх үйлчилгээг хамгийн багадаа 4 зөвлөхтэй хуулийн этгээд (төрийн бус байгууллага, зөвлөх үйлчилгээний компани эсвэл эрдэм шинжилгээний байгууллага) 5 сарын хугацаанд гүйцэтгэнэ.

Мэдүүлгээ ирүүлж буй байгууллага нь уг үйлчилгээг гүйцэтгэх чадвартайг нотлох мэдээлэл (сонирхлоо илэрхийлсэн албан бичиг, шүүхийн шийдвэр гүйцэтгэх газрын тодорхойлолт, татварын болон нийгмийн даатгалын тодорхойлолт, улсын бүртгэлийн гэрчилгээний нотариатаар баталгаажуулсан хуулбар, сүүлийн 2 жилийн санхүүгийн баталгаажуулсан тайлан, ажиллах боловсон хүчний боловсрол, ур чадвар, туршлагын талаарх мэдээлэл)-ийг ирүүлнэ.

Чадварыг нэмэгдүүлж сайжруулах зорилгоор зөвлөхүүд түншлэлийн хэлбэрээр оролцож болно.

Сонирхсон этгээд нэмэлт мэдээллийг onon.kh@nda.gov.mn и-мэйл хаягаар авна уу.

Мэдүүлгээ 2018 оны 6 дугаар сарын 21-ний өдрийн 15.00 цагаас өмнө дор дурдсан хаягаар ирүүлнэ үү.

Үндэсний хөгжлийн газар
Улаанбаатар хот, Чингэлтэй дүүрэг, 
Нэгдсэн Үндэстний Гудамж 5/1 
Засгийн газрын ll байр

(ХБТХ-ийн ахлах мэргэжилтэн Х.Онон, өрөөний дугаар: 201, утас: 266314)